veveyse       rosemarie-devaud-presidente
 
Message de la présidente

             

Po l’an 2016

Allez voir sur la galerie photosles photos de la messe en patois du dimanche 4 octobre 2015à Semsales

Dzoyà Tsalandè,
 
Bounè fithè è boun’an 2016
Tinke rè le mi dè dèchanbre, avui chè premirè patè dè nê. Lè j’infan chè rèdzoyon ti lè dzoua in vouitin le kalandrè.Tsalandè arouvè a gran pâ avui chon kortéje dè guirlandè ke ch’iluminon, è dèvan le chapin on porè poutithre oure chin :Boun’infan, po fére moderno,A trokâ chè dutrè rênePor on grô kamyon bêna.Boun’infan, po fére min dè chayête,

A dèchidâ dè fére chè j’inpyête chu “intarnet”.

Boun’infan, chu on kou dè titha,

A rajâ cha bârba è cha fayoutse frejya

Kontro na pitita barbèta.

Boun’infan, tyè ke tè prin ?

T’irè bin mi dèvan

Che te kontinue dinche,

Nyon mé krèrè in tè !

Mimamin pâ mè !

Chu ha poéji fâchèyàja, I vo kouâjo a ti di bounè fithè, è ke le boun’infan chobrichè avui cha granta bârba !

Ke l’an 2016 chi pyin dè dzouyo, dè bouneu è dè bouna chindâ por vo è vouthrè famiye.

Dè to kà

Vouthra prèjidinta

Rosemarie

Lè 30 an di Takounè

Ichtorik dè la chochiétâ di Takounè,

patèjan de la Vevéje.

Adon i vu vo konto on bokon d’ichtoure. Pâ tan viya, ma dè 30 an.

On bi dzoua oun’anonthe din ‘’Le Messager’’. Université populaire cours de patois. Moncheu Francis Favre dou Krê, Moncheu Reynold Pauchard adon direkteu dè l’èkoula chèkondère è Moncheu Raymond Sudan dè la Toua chè fajan dou pochyin po ha linvoua k’irè intrin dè muri.

E granta chorèprêcha, pra dè dzin chè ch’iran intèrèchi. E to l’evê 81-82 Moncheu Raymond Sudan bayè chè kour dè patè.. Adon po hyoure hou kour, no to dzouno patêjan ke no j’iran, no chin j’elâ medji na fondya ou kâfé dou Tivoli a Tsathi.

To’tin menin lindyèta fayê moujâ a betâ chu pi ôtyè, por inkotchi oun’athinbyâye konstitutive de n’amikale dè patéjan in Vevéje.

Fayè adon trovâ kotyè bounè volontâ. 5 perchenè chon nomâye por on komité. Lè dinche ke nouthra chochiétâ lè vinyête ou mondo le 17 d’avri 1982.

Po menâ ha binda : Denis Colliard anon Pèchu kemin préjidin, Antoinette Romanens chekrétére, Marie-Paule Angel journalichte ke no fo a konyèthre din lè gajètè, Jean Berthoud dè Chinchâlè è mè mima kemin bochêre.

Chi piti komité l’a dèmandâ a dou j’anhyan dè vinyi aportâ on bokon dè lou chavê. Thérèse Suchet dè Frovinthe, l’avè dza ékri du l’y a grantin, po di konkour. Louis Vial dou Krè n’an chavè prà achebin po povi vinyi a nouthron chèkoua.

Premi pochyin, fayi moujâ a bayi on non a ch’t’amikale. La vintanna dè dzin k’iran a la premire athinbyâye l’an propojâ na lichta dè non. Le komité l’avê rèyi lè Takounè in moujin a hou botyè ke krèchon din totè lè têrè, ke bayon lè premi chunyo dou furi. To la keminhyi dinche.

L’evê 82-83 l’amikale rèprin l’organijachyon di kour è Raymond Sudan chàbrè profècheu tantyè in 1984, chin chè pâchè ou lokal di pompié a Tsathi chin Dèni. To bounamin nouthra chochyêta keminthè a krèthre.

Ti lè dzin ke vinyon, tràvon lou konto, l’y a di kour po lè dèbutan, è lè pye chuti chè beton a rèkordâ di pititè pithè. E le 20 d’avri 1985 a nouthr’athinbyâye lè premi monton chu lè lan po dzuyi le ‘’Potyé toupenâ’’. Charly Chaperon, Jean Daniel Liaudat, Philippe Genoud, Sepp Genoud, è Colette Esseiva avui Gérard Genoud po la mije in sène. Hou dzouno j’akteu l’an fê a rakathalâ tota la châla. Lè du inke ke no j’an keminthi a dzuyi di téâtre.

Du 1985 è tantyè a ora no j’an dzuyè 24 kou è Gerard Genoud la achurâ la mije in sène tantyè in 2001. Di gran téâtre chon j’ou dzuyè, ‘’Hou dou moulin’’, ‘’Le Barâdzo’’, ‘’Dona’’, ‘’Po revêre cha Grevire’’, ‘’Lè lu douâ’’, ‘’La Krotséranna’’ è tan d’otrè balè pithè ke vo j’i chure yu.

Du 86 a 2003 nouthron mèteur in sène irè achebin le préjidin dè nouthra chochyètâ.

Du 1984-1989 Antoinette Romanens mênè di vèyè avu lè pye chuti, è fâ a rèkordâ di pititè pithè dè tèatre i j’infan. In 1988 chu lè j’ondè de la RSR vo ji pu oure, ‘’le Bourdyè’’, dzuyi pè lè j’infan. ‘’Trejèta’’, è ‘’Kan l’Amihyâ chin Mêhyè’’, chon achebin j’ou inrèjichrâ a la RSR pè lè dzouno j’akteu ke l’avan fermo le ‘’trak’’

Por intarachi lè dèbutan Colette Chardonnens l’avi betâ chu pi na méthode (audio visuelle). Lè dzouno patèjan chon j’elâ pye yin. L’an keminthi a èkrire, a yêre din di lêvro, è chuto fayi pâ oubyâ la gramère. Chin fâ du 85 tantyê in 91. Colette Chardonnens a bayi lè kour a di j’infan, di dzouno è di min dzouno dè Tsathi è di j’alintoua. Ti inthinbyo din la mima ‘’Classe’’ avui la mima ‘’maitresse’’.

In 92-93 Jean Marie Monnard rèprin lè dèbutan (lè adi inke fô krêre ke l’è on bon réjan) è Martin Staehlin prin lè pye chuti, du 1989 tantyè in 2004. E in apri dè li Agathe Liaudat è Cécile Mettraux tinyon lè lachè.

Di vèyê dè patê chè bayon achebin ou Krè avui Francis Favre, pye tâ Laurent Menoud rèprin to chi mondo.

Ma l’y a achebin di dzouno pè le Krè ke volon aprindre chi lingâdzo dè nouthrè j’anhyan, è du l’ya 2 j’an l’è Roger Favre ke bayè chon chavê.

Por agrèmintâ la ya de l’amikale, è vo tsandji lè j’idé le komité inkotchè ti lè j’an na chayête. Tantyè a ora, irè na korcha chorèprêcha, è ti lè 4 an no van i fithè international dou patê in Franthe ou Val d’Aoste è in Chuiche

Tinke, kemin chè pachâ la ya di Takounè du 1982 tantyè in 2012.

Mè fô dre in to gran marchi a hou ke l’an bayi on bokon dè lou tin po le komité. Du le Kiminthènin tink’ora chin fâ 26 bounè dzin. Chin là l’amikale cherè pâ inke.

Marchi a ti lè j’akteu ke pâchon l’evê a rèkordâ avui no, grâthe a là, la chochiétâ chè portè bin.

A ti lè minbro ke bayon on kou dè man po ke lè téatre chè pachichan po le mi. A ti lè profècheu ke kurtiyon chi lingâdzo din totè lè kotsè.

I rèmarhyo achebin la kemouna dè Tsathi, le kâfé de la Krê Fèdèrale dou Krè, le kâfé di j’èmi à Tatroz, po lou châlè è lou kou dè man.

Dè to Kà, vo rèmârhyo vo ti, d’ithre di nouthro po fithâ hou 30 an

Rosemarie Dévaud